ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᒃᑯᑦ ᐋᖅᑭᒋᐊᕆᕙᓪᓕᐊᔪᑦ ᐃᑦᑕᕐᓂᓴᓕᕆᓂᕐᒧᑦ ᐃᓕᓐᓂᐊᕐᕕᖕᒥ ᐱᓕᕆᐊᓂᒃ ᐊᒻᒪᓗ ᐊᑐᖅᑕᐅᕙᓪᓕᐊᓂᐊᖅᑐᒃᓴᐅᔪᖅ ᓄᑖᖅ, ᐊᔾᔨᐸᓗᖓ ᐃᓕᓐᓂᐊᕈᑎ 2014-ᒥ.

2010 - ᐃᑦᑕᕐᓂᓴᓕᕆᕕᒋᔭᐅᔪᓂ ᐃᓕᓐᓂᐊᓂᖅᑕᖃᓐᖏᑦᑐᖅ

ᐱᔾᔪᑎᒋᓪᓗᒋᑦ ᐊᓯᖏᑦ ᐱᓕᕆᐊᖑᔭᕆᐊᓖᑦ ᐃᖅᑲᓇᐃᔮᑎᒍᑦ, ᐃᑦᑕᕐᓂᓴᓕᕆᓂᕐᒥᒃ ᐃᓕᓐᓂᐊᓂᖅᑕᖃᔾᔮᖏᑦᑐᖅ ᐊᐅᔭᖅ.

2009 - ᐊᕐᕌᒍᖓ ᖃᐅᔨᓴᕐᓂᕐᒧᑦ

ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᐊᒻᒪᓗ ᓄᓇᕗᑦ ᒐᕙᒪᖓ−ᐃᓕᖅᑯᓯᓕᕆᔨᒃᑯᑦ ᐊᐅᔭᖅ ᓄᖅᑲᖓᑲᐃᓐᓇᓂᐊᖅᑐᑦ ᖃᐅᔨᓴᑦᓯᐊᕆᐊᖃᕐᓂᐊᕋᒥᒃ ᐱᓕᕆᐊᒃᓴᒥᒃ ᑐᕌᒐᖏᓐᓄᑦ ᑎᑭᐅᑎᑦᓯᐊᕐᓯᒪᒐᓗᐊᕐᒪᖔᑕ ᐊᒻᒪᓗ ᖃᐅᔨᓇᓱᐊᕐᓗᑎᒃ ᓈᖕᒪᓂᕐᐹᒥᒃ ᐋᖅᑭᑦᓯᒪᓂᐅᔪᒥᒃ ᐃᑦᑕᕐᓂᓴᓕᕆᓂᕐᒧᑦ ᐃᓕᓐᓂᐊᕈᑎᒃᓴᐅᔪᒥᒃ ᓄᓇᕗᒻᒥ.

2006, 2007, 2008 - ᓴᓂᕋᔭᒃ, ᐅᐊᑕᒪᓂᐅᒃ ᓄᓇᖓ

ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ ᐊᒻᒪᓗ ᓄᓇᕗᑦ ᒐᕙᒪᖓ (ᐃᓕᖅᑯᓯᓕᕆᔨᒃᑯᑦ, ᐅᖃᐅᓯᓕᕆᔨᒃᑯᑦ, ᐃᓐᓇᐃᑦ ᒪᒃᑯᑐᓪᓗ ᐱᓕᕆᕝᕕᐊ) ᑲᑐᔾᔨᖃᑎᒌᑦᑐᑎᒃ ᒪᓂᒪᑎᑦᓯᓚᐅᖅᑐᑦ ᐃᓕᓐᓂᐊᕈᑕᐅᕙᓂᐊᖅᑐᒥᒃ ᐃᑦᑕᕐᓂᓴᓕᕆᓂᕐᒥᒃ. ᑕᕝᕙᓂ, ᐊᑕᐅᓯᕐᒥᒃ ᓄᓇᓕᖕᒥᒃ ᐱᓇᓱᐊᕐᕕᖃᓚᐅᖅᑐᒍᑦ ᒪᓂᒪᑎᑦᓯᕕᒋᓂᐊᖅᑕᑎᓐᓂ ᐃᑦᑕᕐᓂᓴᓕᕆᓂᕐᒥᒃ ᐃᓕᓐᓂᐊᓂᕐᒧᑦ ᐊᑐᓂᑦ ᐃᓕᓐᓂᐊᖅᑏᑦ ᐃᑦᑕᕐᓂᓴᓕᕆᔨᒧᑦ ᐃᑲᔪᖅᑎᐅᕙᓪᓗᑎᒃ. ᐃᑲᔪᖅᑎᓪᓗᒋᑦ ᔫᓕᐊ ᕌᔅᒥᒃ, ᐅᑭᐅᖅᑕᖅᑐᖅ ᐊᕕᑦᑐᕐᓯᒪᓂᖓᓂ ᐃᑦᑕᕐᓂᓴᓕᕆᔨ, ᖃᐅᔨᓇᓱᐊᖅᑎᓪᓗᒍ ᐊᐱᖅᑯᑎᑦ ᐃᓚᖏᓐᓂᒃ ᓴᓂᕋᔭᒻᒥ ᑐᓂᖅᑕᓂᐊᕐᕕᖕᒥ, ᐃᓕᓐᓂᐊᓚᐅᕐᒥᔪᑦ ᐅᓄᖅᑐᓂᒃ ᓄᑖᓂᒃ ᐊᔪᕈᓐᓃᕐᓴᐸᓪᓕᐊᓂᕐᒥᓄᑦ. ᐅᓪᓗᓂᒃ ᐊᕐᕕᓂᓕᓐᓂᒃ ᐱᓇᓱᐊᕈᓯᕐᒥ, ᐃᓕᓐᓂᐊᖅᑏᑦ ᐃᑦᑕᕐᓂᓴᕐᓂᐊᕕᖕᒨᕈᔾᔭᐅᕙᑦᑐᑎᒃ ᑕᒪᐅᓐᖓᕋᐃᒐᒥ ᐱᓱᑲᐃᓐᓇᒐᓛᑦᑐᑎᒃ ᐱᓕᕆᕕᐅᔪᒧᑦ ᐱᓇᓱᐊᕐᕕᒋᓂᐊᖅᑕᒥᓄᑦ ᐊᕝᕕᐊᑦᑕᐃᓕᓂᕐᒧᑦ ᓈᓚᕝᕕᒥᓂᖅ ᓴᓗᒻᒪᓴᖅᑕᐅᓂᖓᓂᒃ. ᐅᓪᓗᒃᑯᑦ ᓴᒡᒐᓯᖃᑦᑕᓚᐅᖅᑐᑦ ᐃᓚᖓᓂᒃ ᑕᕝᕙᓂ ᐊᖏᔪᒻᒪᕆᐅᔪᒥ ᐱᓇᓱᐊᕐᕕᐅᔪᒥ, ᖃᕆᓴᐅᔭᒃᑯᑦ ᓇᓗᓇᐃᖅᑐᖅᑕᐅᓯᒪᔪᓂᒃ ᖃᐅᔨᓇᓱᐊᖅᑐᒋᑦ ᐋᖅᑭᑦᓯᒪᓂᖏᑦ ᓄᓇᖓᑕ ᐊᒻᒪᓗ ᐃᑦᑕᕐᓂᓴᐅᓂᖏᓐᓂᒃ ᓴᖅᑮᕙᓪᓕᐊᓪᓗᑎᒃ ᖃᕆᓴᐅᔭᒃᑯᑦ ᓄᓇᓐᖑᐊᓂᒃ, ᐊᔾᔨᓕᐅᕆᕙᑦᑐᑎᒃ ᐊᔾᔨᓕᐅᕈᑎᓄᑦ ᐅᔭᖅᑲᑦ ᖃᓄᐃᓕᖓᓂᖏᓐᓂᒃ, ᐱᖁᑎᑐᖃᒥᓂᕐᓂᒃ ᐊᒻᒪᓗ ᖃᓄᐃᓕᖓᓂᐅᔪᓂᒃ ᐊᒻᒪᓗ ᐃᑲᔪᖃᑦᑕᖅᑐᑎᒃ ᐋᖅᑭᐅᒪᑦᓯᓂᕐᒥᒃ ᑲᒪᒋᔭᐅᒋᐊᖃᕐᓂᖓᓂᒃ ᐃᓂᓪᓚᖓᑦᓯᐊᕆᐊᖃᕐᓂᕐᒧᑦ ᑕᒻᒫᕐᓯᒪᕕᒋᔭᐅᔪᓯ (ᓴᓗᒻᒪᓴᖅᑕᐅᓂᖓ ᖁᕐᕕᒃ, ᐃᒥᖅᑕᕐᓂᖅ, ᐃᑲᔪᕐᓂᖅ ᓂᖅᑎᐅᖅᑐᒥᒃ, ᓴᓗᒻᒪᕐᓴᐃᓂᖅ, ᐊᓯᖏᓪᓗ...). ᐊᒻᒪᓗ ᓱᓕ, ᐅᓪᓘᑉ ᓈᓂᖓᓂ ᓇᖕᒥᓂᖅ ᐅᓪᓗᖅ ᖃᓄᐃᓕᐅᕐᓂᕆᖅᑲᐅᔭᒥᓂᒃ ᑕᑯᒋᐊᖃᑦᑕᓚᐅᕐᒥᔪᑦ ᑎᑎᕋᖃᑦᑕᖅᑐᑎᒃ ᖃᓄᐃᓕᐅᕐᐸᓪᓕᐊᓂᕐᒥᓂᒃ ᖃᐅᑕᒫᕐᓯᐅᑎᒥᖕᓂ. ᖁᔭᓇᓚᐅᕐᐳᖅ ᓯᓚᑦᓯᐊᖑᐃᓐᓇᓂᕐᓴᐅᓚᐅᕐᒪᑦ ᐊᕐᕌᒍᑦᑎᓐᓂ ᐊᕐᕌᓂᓂᒃ ᐊᒻᒪᓗ ᓯᓚᕐᓂᕐᓗᓗᐊᖃᑦᑕᓚᐅᓐᖏᒻᒪᑦ ᐊᐅᓪᓚᕕᑦᓴᐅᖏᓐᓂᖓᓄᑦ ᓄᓇᓕᖕᒥᒃ ᐊᐅᓪᓚᕈᓐᓇᐃᓕᖅᑲᖃᑦᑕᓚᐅᕋᑦᑕ. ᐃᓕᒃᑲᓐᓂᕈᓐᓇᓚᐅᖅᑐᑦ ᐊᓯᖏᓐᓂᒃ ᐱᓕᕆᐊᖑᓲᓂᒃ ᐃᑦᑕᕐᓂᓴᓕᕆᓂᕐᒥᒃ, ᓴᓗᒻᒪᕐᓴᐃᕙᑦᑐᑎᒃ ᐱᖁᑎᑐᖃᒥᓂᕐᓂᒃ, ᖃᐅᔨᒃᑲᓂᖅᑐᑎᒃ ᐆᒪᔫᖃᑦᑕᖅᑐᒥᓃᑦ ᖃᓄᐃᑦᑑᖃᑦᑕᕐᓯᒪᓂᖏᓐᓂᒃ, ᖃᓄᐃᑦᑑᓂᖏᑦ ᐊᖑᑎᑦ/ ᐊᕐᓇᑦ ᐊᒻᒪᓗ ᐃᑦᑕᕐᓂᓴᐅᓂᖏᓐᓂᒃ ᐊᒻᒪᓗ ᐅᑭᐅᖅᑕᖅᑐᒨᖓᓪᓗᐊᑕᖅᑐᓂᒃ ᐃᑦᑕᕐᓂᓴᕐᓂᒃ. ᐱᓕᕆᐊᒃᓴᖓᑕ ᐃᓚᒋᔭᐅᕐᒥᔭᖓ ᐋᖅᑭᑦᓱᐃᓂᖅ ᑕᑯᔭᒃᓴᐅᓂᐊᖅᑐᓂᒃ ᐱᐊᓂᒍᑎᒃ ᐱᓕᕆᐊᒥᖕᓂᒃ ᓴᖅᑭᕋᑦᓴᒥᓂᒃ ᓴᓂᕋᔭᒃ ᓄᓇᓕᖓᓄᑦ. ᐱᓕᕆᓂᓕᒫᖏᓐᓂ ᓂᕆᐅᒋᔭᐅᓚᐅᖅᑐᑦ ᑐᑦᑕᕐᕕᐅᓂᐊᕐᓂᖏᓐᓂᒃ ᓄᓇᓕᖕᒥᖕᓄᑦ ᐊᒻᒪᓗ ᐃᑉᐱᒍᓱᑦᓯᐊᕐᓗᑎᒃ ᓴᓂᕋᔭᒻᒥᐅᓂᒃ.

2005 - ᒥᑦᑎᒪᑕᓕᒃ, ᕿᓚᓗᒃᑲᑦ ᓄᓇᖓ

ᐃᑦᑕᕐᓂᓴᓕᕆᓂᕐᒥᒃ ᐃᓕᓐᓂᐊᓂᕐᒥ ᑕᑉᕙᓂ, ᐊᑐᓂᑦ ᐃᓕᓐᓂᐊᖅᑏᑦ ᐃᑦᑕᕐᓂᓴᓕᕆᔨᒧᑦ ᐃᑲᔪᖅᑎᐅᕙᓚᐅᖅᑐᑦ. ᐃᑲᔪᖅᑐᑎᒃ ᐊᖓᔪᖅᑳᖓᓄᑦ ᐃᑲᔪᖅᑎᖓᓄᓪᓗ ᐃᑦᑕᕐᓂᓴᓕᕆᔩᓐᓄᑦ ᖃᐅᔨᓇᓱᐊᖅᑎᓪᓗᒋᒃ ᐃᓚᖏᓐᓂᒃ ᐊᐱᖅᑯᑎᒋᖃᑦᑕᓚᐅᖅᑕᖏᑕ ᐃᓚᖏᓐᓂᒃ ᕿᓚᓗᒃᑲᑦ ᓄᓇᖓᓂ ᐃᓕᓐᓂᐊᓚᐅᕐᒥᔪᑦ ᐅᓄᖅᑐᓂᒃ ᓄᑖᓂᒃ ᐊᔪᕈᓐᓃᐸᓪᓕᕈᑎᓴᓂᒃ. ᖃᐅᑕᒫᑦ ᐱᓇᓱᐊᕈᓯᓕᒫᒥ ᐃᓕᓐᓂᐊᖅᑏᑦ ᐱᓇᓱᐊᕐᕕᒋᔭᐅᔪᒨᕈᔾᔭᐅᖃᑦᑕᓚᐅᖅᑐᑦ ᐱᓱᒐᓛᑉᐸᑦᑐᑎᒃ ᐱᓕᕆᕕᒋᔭᐅᕙᑦᑐᓄᑦ ᐱᓇᓱᐊᕐᕕᒋᕙᑦᑕᒥᖕᓄᑦ ᐊᖅᑯᑦ ᒪᕐᕋᐅᓗᐊᖃᑦᑕᓚᐅᕐᓂᖓᓄᑦ ᓄᓇᓯᐅᑎᒃᑰᕆᐊᒃᓴᖅ. ᐅᓪᓗᒃᑯᑦ ᓴᒡᒐᖃᑦᑕᓚᐅᖅᑐᑦ ᐃᓚᖓᓂᒃ ᐊᖏᔪᒻᒪᕆᐅᔪᒥ ᐱᓇᓱᐊᕐᕕᐅᔪᒥ, ᖃᕆᓴᐅᔭᒃᑯᑦ ᓇᓗᓇᐃᖅᑐᖅᑕᐅᓯᒪᔪᓂᒃ ᖃᐅᔨᓇᓱᐊᖅᑐᒋᑦ ᐋᖅᑭᑦᓯᒪᓂᖏᑦ ᓄᓇᖓᑕ ᐊᒻᒪᓗ ᐃᑦᑕᕐᓂᓴᐅᓂᖏᓐᓂᒃ ᓴᖅᑮᕙᓪᓕᐊᓪᓗᑎᒃ ᖃᕆᓴᐅᔭᒃᑯᑦ ᓄᓇᓐᖑᐊᓂᒃ, ᐊᔾᔨᓕᐅᕆᕙᑦᑐᑎᒃ ᐊᔾᔨᓕᐅᕈᑎᓄᑦ ᐅᔭᖅᑲᑦ ᖃᓄᐃᓕᖓᓂᖏᓐᓂᒃ, ᐱᖁᑎᑐᖃᒥᓂᕐᓂᒃ ᐊᒻᒪᓗ ᖃᓄᐃᓕᖓᓂᐅᔪᓂᒃ ᐊᒻᒪᓗ ᐃᑲᔪᖃᑦᑕᖅᑐᑎᒃ ᐋᖅᑭᐅᒪᑦᓯᓂᕐᒥᒃ ᑲᒪᒋᔭᐅᒋᐊᖃᕐᓂᖓᓂᒃ ᐃᓂᓪᓚᖓᑦᓯᐊᕆᐊᖃᕐᓂᕐᒧᑦ ᑕᒻᒫᕐᓯᒪᕕᒋᔭᐅᔪᓯ (ᓴᓗᒻᒪᓴᖅᑕᐅᓂᖓ ᖁᕐᕕᒃ, ᐃᒥᖅᑕᕐᓂᖅ, ᐃᑲᔪᕐᓂᖅ ᓂᖅᑎᐅᖅᑐᒥᒃ, ᓴᓗᒻᒪᕐᓴᐃᓂᖅ, ᐊᓯᖏᓪᓗ...). ᐊᒻᒪᓗ ᓱᓕ, ᐅᓪᓘᑉ ᓈᓂᖓᓂ ᓇᖕᒥᓂᖅ ᐅᓪᓗᖅ ᖃᓄᐃᓕᐅᕐᓂᕆᖅᑲᐅᔭᒥᓂᒃ ᑕᑯᒋᐊᖃᑦᑕᓚᐅᕐᒥᔪᑦ ᑎᑎᕋᖃᑦᑕᖅᑐᑎᒃ ᖃᓄᐃᓕᐅᕐᐸᓪᓕᐊᓂᕐᒥᓂᒃ ᖃᐅᑕᒫᕐᓯᐅᑎᒥᖕᓂ. ᓯᓚᓪᓕᕋᐃᒻᒪᑦ ᐅᓪᓗᖅ ᓄᓇᓕᖕᒥᒃ ᓅᖃᑦᑕᓚᐅᓐᖏᑦᑐᑦ ᐊᒻᒪᓗ ᐃᓕᓐᓂᐊᖔᕐᐸᑦᑐᑎᒃ ᐊᓯᖏᓐᓅᖓᔪᓂᒃ ᐃᑦᑕᕐᓂᓴᕐᓂᐊᓂᕐᒥᒃ, ᓴᓗᒻᒪᕐᓴᐃᕙᑦᑐᑎᒃ ᐱᖁᑎᑐᖃᒥᓂᕐᓂᒃ ᐊᒻᒪᓗ ᐅᑭᐅᖅᑕᖅᑐᒨᖓᓪᓗᐊᑕᖅᑐᓂᒃ ᐃᑦᑕᕐᓂᓴᕐᓂᒃ. ᐱᓕᕆᐊᒃᓴᖓᑕ ᐃᓚᒋᔭᐅᕐᒥᔭᖓ ᐋᖅᑭᑦᓱᐃᓂᖅ ᑕᑯᔭᒃᓴᐅᓂᐊᖅᑐᓂᒃ ᐱᐊᓂᒍᑎᒃ ᐱᓕᕆᐊᒥᖕᓂᒃ ᓴᖅᑭᕋᑦᓴᒥᓂᒃ ᒥᑦᑎᒪᑕᓕᒃ ᓄᓇᓕᖓᓄᑦ. ᐱᓕᕆᓂᓕᒫᖏᓐᓂ ᓂᕆᐅᒋᔭᐅᓚᐅᖅᑐᑦ ᑐᑦᑕᕐᕕᐅᓂᐊᕐᓂᖏᓐᓂᒃ ᓄᓇᓕᖕᒥᖕᓄᑦ ᐊᒻᒪᓗ ᐃᑉᐱᒍᓱᑦᓯᐊᕐᓗᑎᒃ ᒥᑦᑎᒪᑕᓕᒻᒥᐅᓂᒃ.

2004 - ᓇᐅᔮᑦ / ᓇᐅᔮᑦ, ᓇᐅᔮᑦ ᓄᓇᖓ

2004−ᒥ, ᓇᐅᑦᓯᑐᖅᑎᒃᑯᑦ ᑲᑐᔾᔨᖃᑎᖃᖅᑐᑎᒃ ᑖᒃᑕ ᓲ ᕋᐅᓕ ᐊᒻᒪᓗ ᕗᑎᔅ ᑲᓚᒻᕕᐊ ᐃᓕᓐᓂᐊᕕᒡᔪᐊᖓᓂᒃ ᑐᑭᓯᒃᑲᓐᓂᕈᒪᓪᓗᑎᒃ ᓇᐅᔮᓂ ᐱᓇᓱᐊᕐᕕᒋᔭᐅᔪᒥ. ᐃᓚᖓ ᓴᒡᒐᖅᑕᐅᓚᐅᖅᑐᒥᓂᐅᓪᓗᓂ ᒪᑎᐊᓴᓐᒧᑦ ᑕᕝᕙᓐᖔᕐᓯᒪᔪᓂᒃ ᑕᓪᓕᒪᒋᓕᖅᑕᖓᓂ ᑐᓂᖅᑕᓂᐊᖅᑏᑦ ᑕᑯᑦᓴᐅᑎᑦᓯᓂᖓᓂ 1920 ᐱᒋᐊᓕᓵᕐᓂᖏᓐᓂ. ᐃᓕᓐᓂᐊᖅᑏᑦ ᐃᓕᑉᐸᓪᓕᓚᐅᖅᑐᑦ ᐊᔾᔨᒌᓐᖏᑦᑐᓂᒃ ᐃᑦᑕᕐᓂᓴᓕᕆᔾᔪᓯᐅᔪᓂᒃ ᐊᔪᕈᓐᓃᕈᑎᒃᓴᖏᓐᓂᒃ ᑎᒍᓯᒃᑲᓐᓂᕈᑎᒃᓴᒥᓂᒃ ᐃᖅᑲᓇᐃᔮᒥᒃ ᐃᖅᑕᕐᓂᓴᕐᓂᐊᓂᕐᒥᒃ ᐃᑲᔪᖅᑎᐅᓂᒥᒃ ᐃᑦᑕᕐᓂᓴᕐᓂᐊᖅᑎᓄᑦ. ᐅᑭᐅᕋᓵᓗᖕᓂᒃ ᐃᓕᓐᓂᐊᑲᓐᓂᕈᑕᐅᓗᓂ ᑭᓯᐊᓂ ᓇᓗᓇᐃᒃᑯᑕᖅᑖᕐᓇᕋᓱᐊᖅᑎᓪᓗᒋᑦ ᐃᑦᑕᕐᓂᓴᕐᓂᐊᖅᑎᐅᓂᕐᒧᑦ, ᓴᖅᑭᔮᕐᓂᖏᑦ ᐊᒻᒪᓗ ᐊᑐᐃᓐᓇᐅᒪᕕᐅᓂᖏᑦ ᐃᑦᑕᕐᓂᓴᕐᓂᐊᓂᕐᒧᑦ ᐱᓕᕆᐊᒃᓴᓂᒃ ᐊᔪᕆᓐᓃᑲᓐᓂᕈᑎᒋᓂᐊᖅᑕᖓ ᓄᓇᓕᖕᓂ ᖃᐅᔨᒪᔪᕐᔪᐊᖑᓂᕐᒧᑦ ᓇᖕᒥᓂᖅ ᓄᓇᒥᖕᓂ ᐃᑦᑕᕐᓂᓴᕐᓂᐊᓂᕐᒥᒃ ᐅᕙᑦᓯᐊᕈᕐᓂᓴᓂᓪᓗ. ᖃᐅᔨᒃᑲᓐᓂᓚᐅᖅᑐᑦ ᐃᑦᑕᕐᓂᓴᕐᓂᐊᕐᓂᖅ ᐃᖅᑲᓇᐃᔮᒃᓴᐅᓂᖓᓂᒃ, ᐱᓕᕆᐊᖑᖃᑦᑕᕐᓯᒪᓂᖓ ᐊᑐᖅᑕᐅᖃᑦᑕᕐᓯᒪᓂᖏᓐᓂᓪᓗ, ᐊᔪᓐᖏᓐᓂᖃᕆᐊᖃᕐᓂᕐᒥᒃ ᐊᐅᓚᔪᓐᓇᓯᐊᕐᓗᓂ ᑎᒥ ᐱᔭᕆᐊᖃᕐᓂᖓ, ᐋᖅᑭᑦᓯᒪᓂᖓ ᐊᐅᓚᑦᓯᓂᐊᕐᓗᓂ ᖃᐅᔨᓴᕐᓂᕐᒥᒃ ᐊᒻᒪᓗ ᐃᑉᐱᒍᓱᑦᓯᐊᕆᐊᖃᕐᓂᕐᒥᒃ ᐊᑐᖅᑕᐅᖃᑦᑕᕐᓯᒪᔪᓂᒃ ᓯᕗᓕᒥᓂᖏᓐᓄᑦ ᐊᐅᓚᑦᓯᓗᑎᒃ ᐃᑦᑕᕐᓂᓴᕐᕕᐅᔪᒥᒃ ᖃᐅᔨᓇᓱᐊᕐᓂᕐᒧᑦ/ᓴᒡᒐᓂᕐᒧᑦ ᐊᐅᓚᑦᓯᓯᐊᕐᓂᕐᒥᒃ.

2003 - ᖁᕐᓗᖅᑐᖅ, Tree River ᓄᓇᖓ (ᓇᐹᖅᑐᓕᒃ ᑰᒃ)

ᐊᐅᔭᖓᓂ 2003, ᐊᒥᓲᓐᖏᑦᑐᑦ ᐃᓕᓐᓂᐊᖅᑏᑦ ᐃᓚᒋᔭᖏᓪᓗ ᐃᓚᒋᔭᐅᓚᐅᖅᑐᑦ ᐃᓕᓴᕆᔭᐅᓯᒪᓐᖏᑐᒃᑯᑦ ᖃᐅᔨᓇᓱᐊᕐᓂᕐᒥᒃ ᓇᐹᖅᑐᓕᖕᒥ ᑰᖕᒥ, ᐅᖓᓯᓗᐊᓐᖏᑦᑐᒥ ᖁᕐᓗᖅᑐᒥᒃ. ᐅᓄᖅᑐᑦ ᖁᕐᓗᖅᑐᖅ ᐃᓐᓇᖏᑦ ᐱᕈᕐᓴᓚᐅᖅᑐᑦ ᑕᒫᓂ ᐊᒻᒪᓗ ᖃᐅᔨᒪᔮᖑᔪᖅ ᐅᓄᖅᑐᓂᒃ ᐃᑦᑕᕐᓂᓴᖅᑕᖃᕆᐊᖓᓂᒃ ᓄᓇᒋᔭᐅᕙᑦᑐᒥᓂᕐᓂᒃ. ᐃᓚᒋᓚᐅᖅᑖ ᑐᕌᒐᖓᑕ ᖃᐅᔨᓴᕐᓂᕐᒧᑦ ᓇᓗᓇᐃᕐᓯᓇᓱᐊᕐᓂᕐᒥᒃ ᐊᒻᒪᓗ ᑎᑎᖅᑲᓄᖅᑲᖅᑕᐅᓗᑎᒃ ᑖᒃᑯᐊ ᓄᓇᑦ ᓴᐳᔾᔭᐅᓯᒪᔾᔪᑎᒃᓴᖏᓐᓂᒃ.

2002 - ᖁᕐᓗᖅᑐᖅ, ᓴᓂᖓᔪᓕᐅᖅᑏᑦ (ᐃᑦᓯᕋᕐᔪᐊᑦ) ᑐᒃᓯᐊᕐᕕᖓ

ᐃᑦᑕᕐᓂᓴᕐᓂᐊᓂᕐᒧᑦ ᐃᓕᓐᓂᐊᓂᖅᑕᖃᓚᐅᖅᑐᖅ ᖁᕐᓗᖅᑐᒥ ᐊᐅᒡᒍᓯ 2002-ᒥ. 2002-ᒥ, ᓯᑕᒪᐅᔪᖅᑐᑦ ᓄᓇᕗᒻᒥᐅᑦ ᐃᓕᓐᓂᐊᖅᑏᑦ ᑲᑎᓯᓚᐅᖅᑐᑦ ᐃᑦᑕᕐᓂᓴᕐᓂᐊᖅᑎᒥᒃ ᑭᐊᓐ ᓱᐊᐃᔾ ᓴᒡᒐᕆᐊᖅᑐᕐᓱᑎᒃ. ᑐᒃᓯᕋᐅᖅᑎᑦ ᐃᓕᓐᓂᐊᖅᑎᓄᑦ ᐱᖃᑕᐅᔪᒪᔪᓄᑦ ᐱᓇᓱᐊᕈᑏᑦ ᓄᓇᕗᓕᒫᒥᒃ ᐱᔭᐅᖃᑦᑕᓚᐅᖅᑐᑦ ᐊᒻᒪᓗ ᐱᖃᑕᐅᓪᓗᑎᒃ ᐃᓕᓐᓂᐊᖅᑏᑦ ᐃᓘᓐᓇᖏᓐᓂᒃ ᐱᖓᓱᓃᓐᖔᖅᑐᑦ ᐊᕕᑦᑐᕐᓯᒪᓂᖏᓐᓂᒃ ᓄᓇᕗᑦ (ᕿᑎᕐᒥᐅᑦ, ᑭᕙᓪᓕᖅ ᐊᒻᒪᓗ ᕿᑭᖅᑖᓗᒃ). ᐃᓕᓐᓂᐊᖅᑏᑦ ᑐᑭᓯᑎᑕᐅᒋᐊᖅᑐᑎᒃ ᐃᑦᑕᕐᓂᓴᓕᕆᕕᐅᓂᐊᖅᑐᒥᒃ ᖁᕐᓗᖅᑐ ᓄᓇᖓᓂ ᐃᒃᓯᕋᕐᔪᐊᓄᑦ ᑐᒃᓯᐊᕐᕕᐅᑉ ᖃᓂᒋᔮᓂ. ᐱᖁᑎᑐᖃᒥᓃᑦ ᐃᓚᒋᔭᐅᓪᓗᑎᒃ ᑲᓐᓄᔭᑦ ᓄᕗᓖᑦ ᕿᔪᒻᒥᒃ ᐃᐳᓖᑦ ᐊᒻᒪᓗ ᐅᒥᕐᒪᑦ ᓇᒡᔪᖏᓐᓂᒃ ᓴᓇᒪᔪᑦ ᖃᓪᓗᑦ ᓇᑉᕚᖅᑕᐅᓚᐅᖅᑐᒥᓂᐅᒻᒥᔪᖅ ᑕᒫᓐᖓᑦ.